மங்காத்தா அஜீத் பாணியில் நடிகர் ரிச்சர்ட்!…

சென்னை:-‘காதல் வைரஸ்’ படம் மூலம் கதாநாயகனாக அறிமுகமானவர் ரிச்சர்ட். இவர் தற்போது நடித்து வரும் புதிய படம் ‘சுற்றுலா’. ‘மங்காத்தா’ படத்தில் அஜீத் வில்லத்தனம் கலந்த கதாநாயகனாக நடித்திருந்தார். அதேபோல் ரிச்சர்ட்டும் இந்தப் படத்தில் வில்லத்தனம் கலந்த கதாநாயகனாக நடித்து வருகிறார்.

இப்படத்தில் கதாநாயகிகளாக ஸ்ரீஜி, அங்கிதா, சாண்ட்ரா ஆகியோர் நடிக்கிறார்கள். மற்றும் ஜெகன், சிங்கமுத்து, ஜாக், கார்த்திக் ஆகியோரும் நடித்து வருகிறார்கள். பரணி இசையமைத்து வரும் இப்படத்திற்கு ரவிசாமி ஒளிப்பதிவு செய்து வருகிறார். கதை, திரைக்கதை, வசனம் எழுதி ராஜேஷ் ஆல்பிரட் இயக்கி வருகிறார்.இப்படம் ஒரே நாளில் நடக்கும் கதையாக உருவாக்கப்பட்டுள்ளது. மலைப் பிரதேசத்தில் ஆடம்பர மாளிகையில் சொகுசாக வாழும் இளைஞன் ஒருவனின் இரு வேறு முகங்களை பரபரவென்று ஓடும் திரைக்கதை மூலம் படமாக்கி வருக்கிறார்கள்.

முழுக்க முழுக்க ஊட்டியிலேயே படமாக்கப்பட்டு வருகிறது. இப்படத்தில் இடம்பெறும் பிரமாண்டமான மாளிகைக்கு தினமும் ஒரு லட்சம் ரூபாய் வாடகை கொடுத்து படமாக்கியிருக்கிறார்கள்.
ஜானி என்ற கதாப்பாத்திரத்தில் நெகடிவ் வேடத்தில் நடிக்கும் ரிச்சர்ட்டின் கலையுலக அங்கீகாரத்திற்கு அஸ்திவாரம் போடும் படமாக சுற்றுலா இருக்கும் என்று இயக்குனர் கூறுகிறார்.