நாடு முழுவதும் இன்றும், நாளையும் வேலை நிறுத்தம்…

சென்னை:- நாடு முழுவதும் 26 அரசுத்துறை வங்கிகள், 12 தனியார் வங்கிகள், 12 அயல்நாட்டு வங்கிகள், 40 கிராமிய வங்கிகள் என 80க்கும் மேற்பட்ட வங்கிகள் 90 ஆயிரத்துக்கும் மேற்பட்ட கிளைகளுடன் செயல்பட்டு வருகின்றன. இது தவிர புதிய தனியார் வங்கிகள், கூட்டுறவு வங்கிகளும் இயங்குகின்றன. இதில் சுமார் 10 லட்சத்துக்கும் மேற்பட்ட ஊழியர்கள் பணிபுரிந்து வருகின்றனர். சில தனியார் வங்கிகள், கூட்டுறவு வங்கிகளை தவிர மற்ற வங்கி ஊழியர்களுக்கான ஊதிய ஒப்பந்த உயர்வு கடந்த 30.10.2012ம் ஆண்டுடன் முடிவடைந்தது. இதையடுத்து வங்கி ஊழியர்கள் பல கட்டங்களாக பேச்சுவார்த்தை நடத்தியும், அதற்கான சுமுக முடிவு எட்டப்படவில்லை. மேலும் கடந்த 18.12.2012ல் அகில இந்திய வங்கி ஊழியர்கள் சார்பில் ஒருநாள் அடையாள வேலை நிறுத்தமும் நடந்தது. இதனை தொடர்ந்து கடந்த ஆண்டு இறுதியிலும், இந்த ஆண்டு துவக்கத்திலும் சென்ட்ரல் லேபர் கமிஷனரிடம் நடந்த பேச்சுவார்த்தையில், நிர்வாகத்துடன் பேச்சுவார்த்தை நடத்தி சுமுக முடிவை எட்ட அறிவுறுத்தப்பட்டது.

அந்த பேச்சுவார்த்தையிலும் 6 சதவீத ஊதிய உயர்வில் ஆரம்பித்து 9.5 சதவீதம் மட்டுமே தருவதாக அரசு தெரிவித்தது. ஆனால் வங்கி ஊழியர்கள் தரப்பில், கடந்த முறை போடப்பட்ட ஊதிய ஒப்பந்தத்தில் 12.5 சதவீதம் வழங்கப்பட்டது. தற்போது 9.5 சதவீதம் மட்டுமே வழங்க முடியும் என்று கூறுவதை ஒருபோதும் ஏற்க முடியாது. விலைவாசி நாளுக்கு நாள் அதிகரித்து வரும் நிலையில், 30 சதவீத சம்பள உயர்வு வழங்க வேண்டும் என்ற கோரிக்கையை தொடர்ந்து வலியுறுத்தி வருகின்றனர். இந்நிலையில், 30 சதவீத சம்பள உயர்வு, வங்கிகளை தனியார் மயமாக்கும் முடிவை கைவிடுதல், வெளிநாட்டு வங்கிகளை இந்தியாவில் முதலீடு செய்ய அனுமதிக்க கூடாது உள்ளிட்ட பல்வேறு கோரிக்கைகளை வலியுறுத்தி அகில இந்திய வங்கி ஊழியர்கள் சங்கம், நேஷனல் யூனியன் வங்கி ஊழியர்கள் சங்கம் உள்பட 9 சங்கங்களை சேர்ந்த 10 லட்சத்துக்கும் மேற்பட்ட ஊழியர்கள் 2 நாள் வேலை நிறுத்தத்தை அறிவித்துள்ளனர். இந்த வேலை நிறுத்தம் இன்றும், நாளையும் நடைபெறுகிறது.

தமிழகம் முழுவதும் சுமார் 90 ஆயிரம் வங்கி ஊழியர்கள் இதில் கலந்து கொள்கின்றனர் என்பது குறிப்பிடத்தக்கது. ஏடிஎம்களை பொறுத்தவரை தினசரி பணம் லோடு செய்யப்படும். நேற்று முன்தினம் சனிக்கிழமை என்பதால் அரைநாள் மட்டுமே ஊழியர்கள் பணிபுரிந்தனர். நேற்று ஞாயிற்றுக்கிழமை. ஏடிஎம்மில் பணம் லோடு செய்ய வாய்ப்பில்லை. இன்றும் நாளையும் வேலை நிறுத்தம். ஏடிஎம்மில் கடந்த வெள்ளிக் கிழமை பணம் லோடு செய்ததோடு உள்ளது. எனவே மூன்றரை நாட்களுக்கு மேலாக ஏடிஎம்மில் பணம் லோடு செய்ய முடியாத சூழ்நிலையில், வாடிக்கையாளர்கள் அடுத்து வரும் நாட்களில் ஏடிஎம்மில் பணம் எடுக்க முடியாத சூழ்நிலை ஏற்படும். மேலும் வேலை நிறுத்தத்தால் வங்கியும் செயல்படாத நிலையில் ஏராளமான வாடிக்கையாளர்கள் கடும் சிரமத்துக்கு உள்ளாகும் சூழல் ஏற்பட்டுள்ளது.