திரூர்: மலப்புரம் மாவட்டம் திரூர் திருப்பரங்கோடு பகுதியைச் சேர்ந்தவர் முகம்மது குட்டி (57). இவருக்கு மனைவியும், 3 மகன்களும். 3 மகள்களும் உள்ளனர். கடந்த 10 வருடங்களாக ஓமான் நாட்டில் இவர் ஒரு ஓட்டலில் சமையல்காரராக பணிபுரிந்து வந்தார்.
இந்நிலையில் கடந்த சில மாதங்களுக்கு முன் ஊர் திரும்பிய முகம்மது குட்டி திருப்பரங்கோட்டில் ஒரு ஓட்டல் தொடங்கினார். ஆனால் அதில் நஷ்டம் ஏற்பட்டதை தொடர்ந்து ஓட்டலை மூடினார். 2 மாதங்களுக்கு முன் இவர் ஒரு லாட்டரி டிக்கெட் வாங்கினார். அதில் ரூ.25 ஆயிரம் பரிசு கிடைத்தது. இதன் மூலம் கிடைத்த பணத்தையும், வங்கியிலிருந்து கடன் வாங்கியும் கடந்த மாதம் முகம்மது குட்டி ஒரு ஆட்டோ வாங்கினார்.
கடந்த சில தினங்களுக்கு முன் இவர் கேரள அரசின் காருண்யா லாட்டரி வாங்கினார். இதில் முதல் பரிசான ஒரு கோடி முகம்மது குட்டிக்கு கிடைத்தது. இந்தப் பணத்தின் மூலம் மீண்டும் ஒரு ஓட்டல் தொடங்கி நடத்தப் போவதாக முகம்மது குட்டி கூறினார்.
அனைத்து புத்தகங்களும் வாங்க அணுகவும்:- பூம்புகார் அங்காடி