20 ஓவர் கிரிக்கெட்டில் இருந்து சங்கக்கரா ஓய்வு அறிவிப்பு!…

கொழும்பு:-வங்காளதேசத்தில் நடந்து வரும் 20 ஓவர் உலக கோப்பை முடிந்ததும் சர்வதேச 20 ஓவர் கிரிக்கெட்டில் இருந்து ஓய்வு பெறுவதாக இலங்கை அணியின் விக்கெட் கீப்பர் சங்கக்கரா அறிவித்துள்ளார். இது குறித்து பத்திரிகை ஒன்றுக்கு சங்கக்கரா அளித்துள்ள பேட்டியில் ‘இது தான் எனது கடைசி 20 ஓவர் உலக கோப்பை போட்டி என்பதில் சந்தேகமில்லை.

இந்த உலக கோப்பைக்கு பிறகு, சர்வதேச 20 ஓவர் கிரிக்கெட்டில் விளையாடமாட்டேன். இது வருத்தமானது தான். ஆனால் அது தான் உண்மை. அதற்காக எனது 20 ஓவர் கிரிக்கெட் வாழ்க்கை முடிந்து விட்டதாக அர்த்தம் இல்லை.சர்வதேச 20 ஓவர் கிரிக்கெட்டில் இருந்து விடை பெற்றாலும், மற்ற வகையான 20 ஓவர் போட்டிகளில் (ஐ.பி.எல். போட்டி உள்ளிட்டவை) விளையாட விரும்புகிறேன்’ என்றார். இலங்கை அணியின் முன்னாள் கேப்டனான 36 வயதான சங்கக்கரா இதுவரை 20 ஓவர் கிரிக்கெட்டில் 50 ஆட்டங்களில் ஆடி 7 அரைசதத்துடன் 1,311 ரன்கள் (சராசரி 32.77) சேர்த்துள்ளார்.

அனைத்து 20 ஓவர் உலக கோப்பை போட்டிகளிலும் பங்கேற்றுள்ளார். ஒரு நாள் போட்டியில் தொடர்ந்து விளையாடுவதை எதிர்நோக்கியுள்ள சங்கக்கரா, ‘2015–ம் ஆண்டு உலக கோப்பை போட்டியில் களம் இறங்குவதே எனது உடனடி இலக்கு. அதுவரை ஆட்டத்திறன் மற்றும் உடல்தகுதியை தொடர்ந்து தக்க வைத்துக் கொள்வேன் என்று நம்புகிறேன். எனது எதிர்காலம் குறித்து தேர்வாளர்களுடன் பேசுவேன்’ என்றும் சங்கக்கரா குறிப்பிட்டார்.