பிரபல ஹீரோக்களின் பாராட்டு மழையில் நனையும் இசையமைப்பாளர்!…

சென்னை:-விஜய்யின் தமிழன் படத்திற்கு இசையமைத்தவர் டி.இமான். அதன்பிறகு ஏராளமான படங்களுக்கு இசையமைத்துள்ளார். என்றபோதும், அவரது பாடல்கள் பேசப்படவில்லை. இந்த நிலையில், பிரபுசாலமனுடன் அவர் இணைந்த மைனா படத்தின் பாடல்கள் சூப்பர் ஹிட்டாகியதோடு, அதையடுத்து, கும்கி, வருத்தப்படாத வாலிபர் சங்கம், பாண்டியநாடு, ரம்மி, ஜில்லா என வரிசையாக ஹிட் கொடுத்து இப்போது பேசப்படும் இசையமைப்பாளராகி விட்டார் இமான்.

அதனால் அவரது கைவசம் 10 படங்களுக்கு மேல் உள்ளது. இதில் கயல் படத்தின் ஆடியோ சமீபத்தில்தான் வெளியிடப்பட்டது. பிரபுசாலமன்-இமானின் கூட்டணி என்றாலே பாடல்கள் சூப்பர் ஹிட்டாகும் என்றொரு செண்டிமென்ட் உருவாகி விட்டதால், அந்த படத்தின் பாடல்கள் வந்ததும் கோலிவுட்டின் பிரபல ஹீரோக்களே அந்த பாடல்களை கேட்டு ரசித்தார்களாம். அதில் விஜய், விஷால், சிவகார்த்திகேயன் உள்ளிட்ட சிலர் அவரை தொடர்பு கொண்டு பாடல்கள் மனதை மயக்குவதாக உள்ளன என்று அவரை பாராட்டினார்களாம்.

அதில் சிவகார்த்திகேயன், எனது ரஜினி முருகன் படத்துக்கும் இதே மாதிரி சூப்பர் பாடல்களாக தர வேண்டும் என்றும் அவரிடம் கேட்டுக்கொண்டாராம். இப்படி தனது பாடல்களை பிரபல நடிகர்களே மனம் திறந்து பாராட்டுவதால் மிகுந்த உற்சாகத்தில் இசையமைத்துக்கொண்டிருக்கிறார் இமான்.